பெரியார் - அண்ணா பிரிய சுதந்திர தினம் காரணமா? 1947-ல் நடந்தது என்ன?

சுதந்திர தினதால் பெரியார் - அண்ணா இடையே விரிசல் வந்தது எப்படி? 1947-ல் நடந்தது என்ன?

இந்தியா சுதந்திரம் பெற்ற 1947 ஆகஸ்ட் 15, நாட்டின் வரலாற்றில் மட்டுமல்ல; தமிழ்நாடு அரசியல் வரலாற்றிலும் ஒரு முக்கியமான திருப்புமுனை. திராவிடர் கழகத் தலைவர் பெரியாருக்கும், அவரது நம்பிக்கைக்குரிய தளபதியாக இருந்த அண்ணாவுக்கும் இடையேயான கருத்து வேறுபாடு முதன்முறையாக பெரிய அளவில் பொதுவெளியில் வெளிப்பட்ட நாள் இதுவாகும். பின்னாளில் இந்த விரிசல் தீவிரமடைந்து, 1949-ல் திமுக உருவாக வழிவகுத்தது.

சுதந்திர தினத்தை பெரியார் ஏன் புறக்கணித்தார்?

1947-ல் ஆங்கிலேயர்கள் இந்தியாவை விட்டு வெளியேறியபோது நாடு முழுவதும் கொண்டாட்டங்கள் நடைபெற்றன. ஆனால், பெரியார் அந்த நாளை கொண்டாட வேண்டாம் என தனது ஆதரவாளர்களிடம் கேட்டுக்கொண்டார்.

இதற்கு முக்கிய காரணம், அவரது ‘திராவிட நாடு’ கோரிக்கை நிறைவேறாதது. ஆங்கிலேயர்களிடமிருந்து அதிகாரம் கைமாறினாலும், தென்னிந்திய மக்களுக்கு அரசியல் மற்றும் சமூக விடுதலை முழுமையாக கிடைக்கவில்லை என்பதே பெரியாரின் பார்வை. மேலும், இந்தியாவில் அதிகாரம் பிராமணர் - பனியா உள்ளிட்ட செல்வாக்கு மிக்க சமூகங்களிடம் சென்றுவிடும் என்ற அச்சத்தையும் அவர் வெளிப்படுத்தினார்.

இதனால் ஆகஸ்ட் 15-ஐ மகிழ்ச்சியான நாளாக அல்லாமல், 'துக்க நாளாக' அனுசரிக்க வேண்டும் என்று பெரியார் கூறினார்.

பெரியாருக்கு மாறாக குரல் கொடுத்த அண்ணா :

அப்போது திராவிடர் கழகத்தின் பொதுச் செயலாளராக இருந்த அண்ணா, பெரியாரின் நிலைப்பாட்டில் இருந்து மாறுபட்டார்.

இந்தியா ஆங்கிலேய ஆட்சியிலிருந்து விடுதலை பெற்றது ஒரு முக்கியமான சாதனை என்றும், அதனை கொண்டாட வேண்டும் என்றும் அவர் வலியுறுத்தினார். தனது ‘திராவிட நாடு’ இதழில், திராவிட இயக்கத்தின் நோக்கங்களில் ஒன்று வெளிநாட்டு ஆட்சியிலிருந்து விடுதலை பெறுவது என்றும், மற்றொன்று சமூக ஆதிக்கத்திலிருந்து விடுதலை பெறுவது என்றும் விளக்கினார்.

ஆங்கிலேயர்களை வெளியேற்றுவது என்ற இலக்கில் ஒரு பகுதி நிறைவேறியுள்ள நிலையில், அந்த நாளை கொண்டாடாமல் இருப்பது சரியாகாது என்பதே அண்ணாவின் வாதம். ஆகஸ்ட் 15-ஐ “இன்ப நாள், இனிய நாள்” என்ற உணர்வுடன் கொண்டாட வேண்டும் என்றும் அவர் அழைப்பு விடுத்தார்.

“காங்கிரஸை எதிர்ப்பது வேறு; ஆங்கிலேயரை ஆதரிப்பது வேறு!” :

காங்கிரஸ் மீது திராவிட இயக்கம் கடுமையான எதிர்ப்பைக் கொண்டிருந்த காலம் அது. ஆனால், காங்கிரஸை எதிர்ப்பது என்பது ஆங்கிலேய ஆட்சியை ஆதரிப்பதாகாது என்று அண்ணா தெளிவுபடுத்தினார்.

திராவிடர் கழகம் சுதந்திர தினத்தை புறக்கணித்தால், காங்கிரஸார் தங்களை ஆங்கிலேயர்களுக்கு ஆதரவானவர்கள் என விமர்சிக்க வாய்ப்பு ஏற்படும் என்றும் அவர் எச்சரித்தார்.

அண்ணாவின் செல்வாக்கை வெளிப்படுத்திய ஆகஸ்ட் 15 :

பெரியார் கொண்டாட வேண்டாம் என்று கூறியிருந்தபோதிலும், திராவிடர் கழகத்தின் கணிசமான தொண்டர்கள் அண்ணாவின் அழைப்பை ஏற்று சுதந்திர தினத்தை கொண்டாடினர்.

ஒரே இயக்கத்தில் இருந்தபோதும், தலைவரின் அறிவுறுத்தலுக்கு மாறாக தொண்டர்கள் அண்ணாவின் அழைப்பை ஏற்றது அவரது செல்வாக்கை வெளிப்படையாக காட்டியது. பின்னாளில் தனி அரசியல் இயக்கத்தை உருவாக்குவதற்கான அண்ணாவின் நம்பிக்கைக்கு இந்த நிகழ்வு முக்கிய அடித்தளமாக அமைந்ததாகக் கருதப்படுகிறது.

உடனடியாக பிரிவு ஏற்படவில்லை :

1947 சுதந்திர தின விவகாரத்துடன் பெரியார் - அண்ணா உறவு உடனடியாக முறிந்துவிடவில்லை. 1948-ல் ஈரோட்டில் நடைபெற்ற இந்தி திணிப்பு எதிர்ப்பு மாநாட்டில் அண்ணா பங்கேற்றார்.

ஆனால், பின்னர் பெரியார் - மணியம்மை திருமணம் உள்ளிட்ட நிகழ்வுகள் இருவருக்கும் இடையேயான விரிசலை மேலும் தீவிரப்படுத்தின. இயக்கத்தின் எதிர்காலம், தலைமைத்துவம் மற்றும் அரசியல் அணுகுமுறை தொடர்பான கேள்விகளும் எழுந்தன.

1949-ல் உருவானது திமுக :

இறுதியில், 1949-ல் அண்ணா தலைமையில் திராவிட முன்னேற்றக் கழகம் (தி.மு.க.) உருவானது.

பெரியார் சமூக சீர்திருத்தம் மற்றும் பகுத்தறிவு இயக்கத்துக்கு முன்னுரிமை அளித்த நிலையில், அண்ணா தேர்தல் மற்றும் அரசியல் அதிகாரத்தின் மூலம் சமூக மாற்றத்தை ஏற்படுத்த முடியும் என்று நம்பினார். இதுவே இருவரின் அரசியல் பாதைகளில் ஏற்பட்ட மிகப்பெரிய வேறுபாடுகளில் ஒன்றாக அமைந்தது.

பின்னர் 1956-ல் திமுக தேர்தல் அரசியலில் களமிறங்கி, 1967-ல் தமிழ்நாட்டில் ஆட்சியை கைப்பற்றியது.

எனவே, பெரியார் - அண்ணா இடையேயான விரிசல் ஒரே நாளில் உருவானதல்ல. ஆனால், 1947 ஆகஸ்ட் 15 சுதந்திர தின விவகாரம் அவர்களின் வேறுபாடுகளை பொதுவெளியில் வெளிப்படுத்திய முக்கியமான திருப்புமுனையாக அமைந்தது. அந்த சிறிய அரசியல் விரிசலே, காலப்போக்கில் தமிழக அரசியலையே மாற்றிய மிகப்பெரிய பிரிவாக மாறியது.